“တေႁဵတ်းၵၢၼ်သင်ၵေႃႈ ထုၵ်ႇလီမီးၵၢၼ်ဝၢင်းၽႅၼ်”

ႁဝ်းတေႁဵတ်းတေသၢင်ႈဢီႈသင်သေၵေႃႈယႃႇ ထုၵ်ႇလီမီးၵၢၼ်ဝၢင်းၽႅၼ်၊ ၶူင်းၵၢၼ် လႄႈ ၽူႈႁၢပ်ႇပုၼ်ႈၽွၼ်း ဢၼ်တဵမ်ထူၼ်ႈ။
ဢွၼ်တၢင်းတေတႄႇပၢင်ၵုမ် ပၢင်ဢုပ်ႇဢူဝ်းၼၼ်ႉ ထုၵ်ႇလီၶိုၼ်းထတ်းတူၺ်း ထွမ်ႇတူၺ်း ၶေႃႈသလုပ်ႇငၢၼ်းမိူဝ်ႈဝၼ်းပူၼ်ႉၼၼ်ႉသေၵွၼ်ႇ။
ႁၼ်ထိုင်ဝႃႈ ထုၵ်ႇလီမီးၼင်ႇၼႆ
1) ၶွတ်ႇၽွတ်ႈၵေႃပွင်ၵၢၼ်/ ၵေႃႁၢင်ႈႁႅၼ်း။
2) လိူၵ်ႈၽူႈၸတ်းၵၢၼ်ၵူႈလွင်ႈလွင်ႈ (1/2) ၵေႃႉ။
3) ႁႂ်ႈမီးၵေႃႉသၼိူဝ်ၶူင်းၵၢၼ်။ ယဝ်ႉၵူႈၵေႃႉ ပၼ်တၢင်းႁၼ်ထိုင် လႄႈ လႅၵ်ႈလၢႆႈႁႂ်ႈလီလိူဝ်ဢွၼ် ၶႅမ်ႉတွၼ်းလိူဝ်ၵဝ်ႇ။
4) မႅင်ႈၼႃႈတီႈ ႁႂ်ႈၸႅင်ႈလႅင်း လႄႈ ပဵၼ်ၽၢႆႇလႂ်ၽၢႆႇၼၼ်ႉ (ႁွင်ႈၵၢၼ်)။
5) ႁႂ်ႇမီးပၢင်ၵုမ်ၽၢႆႇ (ႁွင်ႉၵၢၼ်လႂ် ႁွင်ႈၵၢၼ်ၼၼ်ႉ)
6) ၵေႃႉဢၼ်လႆႈႁပ်ႉၼႃႈတီႈပုၼ်ႈၽွၼ်းယဝ်ႉၼၼ်ႉ ႁႂ်ႈႁဵတ်းၵၢၼ်တဵမ်တီႈ လႄႈ ပွင်ႇလႅင်းပၼ်ၶိုၼ်း ၽူႈၸတ်းၵၢၼ်/ ၵေႃပွင်ၵၢၼ်/ ၽၢႆႇၵပ်းသိုပ်ႇ လွင်ႈဝႃႈ မီးလွင်ႈၶိုပ်ႈၼႃႈ ဢမ်ႇၼၼ် ယူပ်ႈယွမ်း ၼင်ႇႁိုဝ် လႄႈ ၸိူင်ႉႁိုဝ်။
7) ဢွၼ်တၢင်းငၢၼ်းတေတႄႇ ႁႂ်ႇမီးပၢင်ၵုမ်လူင် ဢၼ်ၵူႈၵေႃႉ ၼႂ်းၵေႃမႃးၶဝ်ႈႁူမ်ႈလႆႈ ၸိၸႅင်ႈၽႅၼ်ၵၢၼ်/ ၶူင်းၵၢၼ်တၢင်းမူတ်း။ (ႁႂ်ႈႁဵတ်းပဵၼ်ၽိုၼ်လိၵ်ႈၽိုၼ်လၢႆးသေ ၸိၸႅင်ႈ လႄႈ သူင်ႇၼႂ်းဢီးမေးလ်/ သူင်ႇပၼ်ၵူႈၵေႃႉ ပုၼ်ႈတႃႇၵေႃႉဢၼ်ဢမ်ႇမႃးၶဝ်ႈႁူမ်ႈလႆႈၼၼ်ႉ တေလႆႈႁပ်ႉႁူႉ ၵူႈၸိူင်ႉၵူႈလွင်ႈ။
8) ဝၢႆးငၢၼ်းယဝ်ႉတူဝ်ႈယဝ်ႉ ႁႂ်ႇမီးပၢင်ၵုမ်သလုပ်ႇငၢၼ်း ပုၼ်ႈတႃႇတေလႆႈႁူႉ တီႈယူပ်ႈယွမ်း လႄႈ ဢဝ်ၵႂႃႇၵႄႈၶႆၼႂ်းဝၼ်းတၢင်းၼႃႈ (ႁႂ်ႈတႅမ်ႈမၢႆဝႆႉ ၶႅမ်ႉလႅပ်ႈတဵမ်ထူၼ်ႈ)

ၼႆႉ ပဵၼ်ၶေႃႈႁၼ်ထိုင်သုၼ်ႇတူဝ်
ၸၢင်ႈတေၽိတ်း/ ၸၢင်ႈတေဢမ်ႇတဵမ်ထူၼ်ႈၵေႃႈပဵၼ်လႆႈ
သင်ႁၼ်တီႈၽိတ်း လႄႈ ၼင်ႇႁိုဝ်တေတဵမ်ထူၼ်ႈၼၼ်ႉ ၽိူမ်ႉထႅမ်တႅမ်ႈပၼ်ၼႆ
ငိၼ်းလီၸူမ်းသိူဝ်း လႄႈ ငိၼ်းလီႁပ်ႉတွၼ်ႈယူႇၶႃႈဢေႃႈ။

“တၢင်းၽိတ်းမိူဝ်ႈဝၼ်းဝႃး ၸွင်ႇႁႃးထုၵ်ႇဢဝ်ပဵၼ်တွၼ်ႈသွၼ်”

ယုမ်ႇယမ်လႄႈ ႁၼ်ထိုင်ဝႃႈ ႁဝ်းတေႁဵတ်းၵၢၼ်သင်ၵေႃႈယဝ်ႉ ထုၵ်ႇလီမီး ၵၢၼ်ဝၢင်းၽႅၼ်/ ၽႅၼ်ၵၢၼ်ဢၼ်တႅတ်ႈၼႅတ်ႈၸႅင်ႈလႅင်း လႄႈ ထုၵ်ႇလီမီးဝႆႉပႃး ၽႅၼ်ထိိ (2) ၶူပ်ႇမိူဝ်ႈမီးလွင်ႈၶိုၵ်ႉၶၢၵ်ႉၵိူတ်ႇၶိုၼ်ႈမီးမႃး။

တွၼ်ႈသွၼ်ၼႆႉ ပေႃးတွင်းဢမ်ႇၽိတ်းတႄႉ မီးမႃးၼမ်ၼႃႇယဝ်ႉ ၵူၺ်းၵႃႈၵေႃႈ သမ်ႉတိုၵ်ႉသိုပ်ႇမီး သိုပ်ႇၽိတ်းယူႇတိၵ်းတိၵ်း။ ဢမ်ႇႁူႉဝႃႈ မိူဝ်ႈလႂ်တေဢွၼ်မုင်ႈဝၢႆႇယၵ်ႉလွမ် တူၺ်းတၢင်းၽိတ်းမိူဝ်ႈဝၼ်းသိုၼ်းဝႃးၼၼ်ႉသေ ဢဝ်မႃးၸႂ်ႉတိုဝ်း ႁဵတ်းပဵၼ်တွၼ်ႈသွၼ်ၵႂႃႇ ပုၼ်ႈတႃႇလီမိူဝ်ႈၼႆႉ၊ မိူဝ်ႈၽုၵ်ႈ လႄႈ မိူဝ်းၼႃႈမိူဝ်ႈလႂ်သေဢမ်ႇဝႃႈ ႁႂ်ႈလီလိူဝ်ဢွၼ် တိူဝ်းတွၼ်းလိူဝ်ၵဝ်ႇ။

လွင်ႈယူပ်ႈယွမ်း/ လွင်ႈၽိတ်းပိူင်ႈ ဢၼ်ၵိူတ်ႇၶိုၼ်ႈမီးမႃး မိူဝ်းဝႃးမိူဝ်ႈသိုၼ်းၼႆႉ
သုၼ်ႇတူဝ်သေတႄႉ ႁၼ်ထိုင်ဝႃႈ ...
1) မီးပၢင်ထူပ်းၵၼ်/ ဢုပ်ႇၵၼ်ယူႇၵေႃႈ ဢမ်ႇမီးမႃးၶေႃႈတႅပ်းတတ်း။ ဢမ်ႇမီးမႃးၽႅၼ်ၵၢၼ် ဢမ်ႇၼၼ် ၶူင်းၵၢၼ်။
2) မိူၼ်ႁၢင်ႈမီးၽႅၼ်ၵၢၼ်ယူႇၵေႃႈ ဢမ်ႇၸႅင်ႈလႅင်း၊ ဢမ်ႇတႅတ်ႈၼႅတ်ႈတႅတ်ႈတေႃး (တေတႄႇၸိူင်ႉႁိုဝ်၊ လူၺ်ႈၽႂ်၊ ၽႂ်ၽွင်ႈတေမႃးၵဵဝ်ႇၶွင်ႈ၊ ၽွင်းလႂ်သမ်ႉ တေမီးဢီႈသင် လႄႈ တေယဝ်ႉတူဝ်ႈၵႂႃႇလူၺ်ႈၸိူင်ႉၼင်ႇႁိုဝ်။
3) ဢမ်ႇၸႅၵ်ႇၼႃႈတီႈပုၼ်ႈၽွၼ်း။
4) ၽႅၼ်ၵၢၼ်ထိ (႒) ဢမ်ႇမီးဝႆႉ မိူဝ်းမီးလွင်ႈၶိုၵ်ႉၶၢၵ်ႉ။ (တႆးၵေႃႉၵေႃႉၼိုင်ႈယင်းယဝ်ႉယွၵ်ႇလၢတ်ႈ “ယႃႇဝႃႈတေမီးၽႅၼ်ၵၢၼ်ထိ (2) လႃႈ တေႃႈၽႅၼ်ထိ (1) ႁဝ်းႁႃးယင်းဢမ်ႇမီး” ဝႃႈၼႆ၊ မႅၼ်ႈယူႇတႄႉလႂ်။

ၵွပ်ႈပိူဝ်ႈၶၢတ်ႇ ဢၼ်လၢတ်ႈမႃးပႃႈၼိူဝ်ၼႆႉလႄႈ ၵၢၼ်ဢၼ်ဢၢင်ႈတေဢွၵ်ႇမႃးလူၺ်ႈ ၾၢင်ႁၢင်ႈ ဢၼ်ၶႅမ်ႉလႅပ်ႈႁၢင်ႈလီ လႄႈ ၵူႈၵေႃႉၵေႃႈ “ႁႅပ်းပီႉဢႅၼ်ႉၻိင်ႉ” ဢၼ်ဝႃႈၼၼ်ႉ ႁိုဝ်တေပဵၼ်မႃးယဝ်ႉလႃႇ။

ၶေႃႈထၢမ်ၼႂ်းၸႂ်တႄႉ လႄႈထႅင်ႈလၢႆၵေႃႉၵႂႃႇ။
ၸွင်ႇၵိုင်ႇငၢမ်ႇယူႇႁႃႉ တၢင်းတၼ်းႁဵင်းၼၼ်ႉ။
တႅၼ်းတီႈတေမႃးၸုၵ်းသိုဝ်ႈသိုဝ်ႈၵၢင် ႁႃးသမ်ႉဢိူင်ႇဢၢင်ၸိူၼ်းတူဝ်ၵွမ်းႁူဝ်ၽၢႆလႂ်ၽႆၼိုင်ႈ
လူၺ်ႈယင်းပႆႇႁူႉၶေႃႈပဵၼ်တႄႉမီးတႄႉၼၼ်ႉ ?

ၶေႃႈၶမ်ၸႂ်ႁႃး
လွင်ႈၵိူတ်ႇမိူဝ်းဝႃး
ၼႆႉ ဢၼ်ပႃးၵၼ်တၢင်းမူတ်းၵႂႃႈ ၶႂ်ႈဝႃႈတႄႉ …။

ၸွင်ႇထုၵ်ႇလီဢဝ်
ၶေႃႈမဝ်မိူဝ်ႈဝႃး
ပဵၼ်မႃးတွၼ်ႈသွၼ်
ၶေႃႈဢွၼ်လီမိူဝ်ႈၼႆႉ၊ မိူဝ်ႈၽုၵ်ႈ လႄႈ မိူဝ်းၼႃႈၶၢဝ်းႁိုင်ႁႃႉ …… ?

ပၢင်လူႇတၢၼ်းႁဵတ်းၵုသုလ်တၢင်းလီ ၼႂ်းၶွၵ်ႈ

ဝၼ်းထိ 20.10.2010 (ဝၼ်းဢင်းၵၢၼ်)
ၼင်ႈသေႁဵတ်းၵၢၼ်ယူႇၵေႃႈ မိူၼ်ႁၢင်ႈငဝ်လပ်း မွႆႈလပ်းမႃးပဵၼ်ၵမ်းပဵၼ်ၵမ်းယူႇ၊၊ ၵွပ်ႈသင်ၼႆတႄႉၵေႃႈ တေလႆႈလၢတ်ႈဝႃႈ ၵွပ်ႈၼႂ်ၼႆႉတိုၼ်ႇၸဝ်ႉသေ ၵႂႃႇႁဵတ်းလွင်ႈတူင်ႉၼိုင် ၼႂ်းၶွၵ်ႈမႃးၼၼ်ႉယဝ်ႉ။

ၶၢဝ်းယၢမ်း 09.30 လႆႈၶဝ်ႈၵႂႃႇၼႂ်းၶွၵ်ႈ ႁူမ်ႈတၢင်းတႆးၵေႃႉထႅင်ႈ 6 ၵေႃႉ လႄႈၸဝ်ႈၸၢင်းသွင်ပႃး။ ပေႃးထႅင်ႈ 2-3 ဝၼ်းၵေႃႈ တေထိုင်ဝၼ်းဢွၵ်ႇဝႃႇယဝ်ႉလႄႈ တၢင်းပီႈၼွင်ႉတႆးၼႂ်းၶွၵ်ႈ မွၵ်ႈ 300 ပၢႆပၢႆသေ လႆႈႁူမ်ႈလူႇႁူမ်ႈတၢၼ်း ႁဵတ်းတၢင်းလီၵုသုလ်ၸွမ်းၵၼ် ၼႂ်းဢွၵ်ႇဝႃႇ ပီ 2010။

“ၵိၼ်လဝ်ႈၶဝ်ႈသင်ၶူမ်း” ၼႆဝႃႇ

ဝူင်ႈဝၢင်ႈၼႆႉ ၶႂ်ႈဝႃႈသူတ်ႉၼမ်ႉမဝ်းယူႇ ၵူႈၶမ်ႈၶိုၼ်းယဝ်ႉ၊ ပဵၼ်သင် မီးသင် လႄႈ ယွၼ်ႉသင်သေလႄႈ ၶႂ်ႈသူတ်ႉၼမ်ႉမဝ်းၼႆတႄႉၵေႃႈ ၶူၼ်ႉသွၵ်ႈတဝ်ႁႃ ၵႂၢမ်းတွပ်ႇၶေႃႈသပ်းလႅင်းမၼ်း ယင်းဢမ်ႇပႆႇႁၼ်၊ ဢိုမ်ႈ! ပေႃးလၢတ်ႈဝႃႈ ယင်းဢမ်ႇပႆႇၸႅင်ႈလႅင်းၼႆ တေထုၵ်ႇမႅၼ်ႈၵႂႃႇႁိုဝ်ဢမ်ႇႁူႉ။
ဝႆႉသေလႄႈၼေႃႈ ဢဝ်ပဵၼ်ဝႃႈ “ၵိၼ်ႈလဝ်ႈၶဝ်ႈသင်ၶူမ်း” ၼႆသေယဝ်ႉဢိူဝ်ႈ၊ သိုပ်ႇၵိၼ်ၵႂႃႇ သိုပ်ႇမဝ်းၵႂႃႇ သင်မီးၸႂ်သိူဝ်းသႃႇၸိုင် သိုပ်ႇႁဵတ်းၵႂႃႇၼၼ်ႉၼႃႇဢႄႉ၊ မိူဝ်ႈၽုၵ်ႈတေပဵၼ်သင် ၸင်ႇဝႃႈၵၼ်ၼၼ်ႉယိုင် ။

ပုၼ်ႈၽွၼ်းပိုၼ်းပၼ်

ထိုင်ႁွတ်ႈၽႅဝ်မႃးယဝ်ႉ ပီတႆး ႒႑႐႔ ဢႃႇယူႉၸူဝ်ႈပၢၼ်ၵေႃႈ ယႂ်ႇတိုင်ႈထိုင်ၽႅဝ်ယၢင်ႈၶဝ်ႈသူႇတဝ်ႈယဝ်ႉထႅင်ႈၼိုင်ႈပီ၊ ပီမႂ်ႇတႆးပီၼႆႉ တေလႆႈလၢတ်ႈဝႃႈ ႁၢၼ်ႉၸႂ်ပဵင်းပေႃးတႄႉတႄႉ ၵွပ်ႈသင်ၼႆၸိုင် ၵွပ်ႈလႆႈႁဵတ်းလႆႈသၢင်ႈ လႆႈၸွႆႈလႆႈထႅမ် ဢမ်ႇဝႃႈဢဝ်တၢင်းဢဵၼ်ႁႅင်း လႄႈ ဢဝ်တၢင်းႁႅင်းတူဝ်ႁူဝ်ၸႂ်ငိုၼ်းၶမ်း ၸွႆႈတဵမ်တီႈ လႄႈ တဵမ်ထူၼ်ႈ။ ၵိူတ်ႇပဵၼ်မႃး လုၵ်ႈမႄႈတႆးၵေႃႉၼိုင်ႈယဝ်ႉလႄႈ မီးဝႆႉပုၼ်ႈၽွၼ်း ပုၼ်ႈတႃႇႁၵ်ႉသႃထိင်းသိမ်းဝႆႉ ၾိင်ႈငႄႈႁိတ်ႈထုင်း၊ တိုၼ်းမီးဝႆႉပုၼ်ႈၽွၼ်းဢၼ်ပိုၼ်းပၼ်လႄႈ ၵႃႈၸူဝ်ႈယင်းမီးလူမ်းႁၢႆၸႂ်ယူႇတႄႉ ယူႇတီႈလႂ် ၽႅဝ်ဢွင်ႈလႂ်ၵေႃႈ ၼင်ႇပွင်ပဵၼ်လႆႈၼၼ်ႉ တိုၼ်းတေၶဝ်ႈၸွႆႈ ႁဵတ်းသၢင်ႈ လူၺ်ႈ ဢဵၼ်ႁႅင်းသူပ်းတူဝ်ႁူဝ်ၸႂ် ငိုၼ်းၶမ်း ဢမ်ႇလၢႆးၼိုင်ႈၵေႃႈ လၢႆးၼိုင်ႈၼႆ တိုၼ်းပၼ်ဝႆႉၵႂၢမ်းတူဝ်ၵဝ်ႇယူႇ။ သေလႄႈ တေလၢတ်ႈႁႂ်ႈႁူႉဝႃႈ ဢမ်ႇၸႂ်ႈၵႂၢမ်းမၼ်ႈၽူႈႁၢမ်းဢၢႆ ဢၼ်ဝႃႈၼၼ်ႉယဝ်ႉ။ ၶၢဝ်းတၢင်းသူင်ႇသင်ႇပီၵဝ်ႇ ႁပ်ႉတွၼ်ႈပီမႂ်ႇတႆး ႒႑႐႔ ဢၼ်လႆႈၸတ်းႁႅၼ်းၶပ်းၶိုင်ယဝ်ႉတူဝ်ႈၵႂႃႈ ၼႂ်းဝၼ်းထိ ႑႕-႑႗/ ႑႑/ ႒႐႐႙ တီႈဝတ်ႉၵူႇတဝ်ႈ ၵဵင်းမႆႇၼၼ်ႉ တေလႆႈလၢတ်ႈဝႃႈ ပဵၼ်ဢၼ်ၵိုၼ်းဢိုၵ်ႉဢိုၵ်ႉ လႄႈ တေလႆႈလၢတ်ႈဝႃႈ ႁဝ်းႁႃးၸိူဝ်းတႆး ႁဵတ်းသၢင်ႈယဝ်ႉတူဝ်ႈၵႂႃႇ ပုၼ်ႈၽွၼ်းပိုၼ်းပၼ်ၼၼ်ႉယဝ်ႉၼိုင်ႈပီ လၢတ်ႈၸိူင်ႉၼႆၵေႃႈ တိုၼ်းဝႃႈဢမ်ႇၽိတ်း ဢမ်ႇပိူင်ႈၼၼ်ႉယဝ်ႉ။ လႆႈငိၼ်းၶၢဝ်ႇဝႃႈ ယူႇတီႈၵေႃလိၵ်ႈၾိင်ႈတႆးသေ လႆႈဢွၼ်ႁဵတ်းဢွၼ်သၢင်ႈ ဢွၼ်လူႇဢွၼ်တၢၼ်း ဢွၼ်လဵၼ်ႈၸဵင် ၵိၼ်ၸဵင်ၵူၺ်းဢမ်ႇၵႃး ယင်းမီးဝႆႉတိုၼ်းၵွင်ၵၢင် ပုၼ်ႈတႃႇလွင်ႈတူင်ႉၼိုင် လႄႈ ၸွႆႈထႅမ် ၼႂ်းၵၢၼ်ၵေႃလိၵ်ႈၾိင်ႈလႄႈ၊ ၵၢၼ်တူင်ႇဝူင်းၵူၼ်း လႄႈ ၵၢၼ်ၶဝ်ႈႁူမ်ႈပဵၼ်ၼႃႈပဵၼ်တႃ ပီႈၼွင်ႉတႆးၼႂ်းၵဵင်းမႆႇ လႄႈ မိူင်းထႆး ဢၼ်လႆႈမႃးပိုင်ႈႁူမ်ႈပိုင်ႈၽူၺ်း ၸဝ်ႈမုၼ်ယႂ်ႇၶုၼ်ႁေႃၶမ်း မိူင်းထႆး ဝႃႈၼႆယဝ်ႉ။

ဝၼ်းၼိုင်ႈမႃး မႂ်းတေႁူႉ !

ဢိင်ၼိူဝ်လွင်ႈတၢင်းဢွၼ်ႇဢၼ်ၼိုင်ႈသေ မၢင်ပွၵ်ႈမၢင်လႂ်မႃးၵေႃႈ ၸႂ်ၶေႃးဢမ်ႇပေႃးသိူဝ်းမူၼ်ႈ၊ ၵၢၼ်ယၢပ်ႇၼၵ်းၼႃၼၼ်ႉ ႁဵတ်းလႆႈသၢင်ႈလႆႈတဵမ်ထူၼ်ႈယူႇ ဝႃႈၼႆသေတႃႉ ပေႃးဢၼ်လႆႈယိၼ်းၵႂၢမ်းလၢတ်ႈၵႂၢမ်းသေႉၵႂၢမ်းၼေး ၵၢႂမ်းမၢပ်ႇမႂ်ၼႆၸိုင်တႄႉ ဢမ်ႇပေႃးၶႂ်ႈမီးႁႅင်းၵမ်ႉၶၢမ်ႇ၊ သင်ပဵၼ်လွင်ႈတႄႉ ဝႃႈၼႆၸိုင် တိုၼ်းဢမ်ႇထဵင်သင်သေ တေမူၼ်ႈသိူဝ်းတုင်ႉႁပ်ႉဢဝ်ၵမ်းလဵဝ်။ ၵွပ်ႈပိူဝ်ႈဢၼ်ၼႆႉတႄႉ မၼ်းပဵၼ်ၶေႃႈမၢပ်ႇမႂ် ထၢင်ႇထိူမ်လႄႈ တိုၼ်းဝႃႈ ယွမ်းႁပ်ႉဢမ်ႇလႆႈ ၶႂ်ႈမွၵ်ႇလၢတ်ႈၸိူင်ႉၼႆ။ ၸိူင်ႉႁိုဝ်ၵေႃႈလီ ယုမ်ႇယမ် လႄႈမုင်ႈမွင်းဝႃႈ ၵၢၼ်ဢၼ်ႁႃးႁဝ်းႁဵတ်းၼၼ်ႉ ဝၼ်းၼိုင်ႈမႃး မႂ်းတေႁူႉ ဝႃႈၼႆသေ တေပၼ်ႁႅင်းၸႂ်ၸဝ်ႈၵဝ်ႇသေၵွၼ်ႇ။

မိူၼ်ႁၢင်ႈယုင်ႈယၢင်ႈဝႆႉႁိုဝ်ၵေႃႈ ဢမ်ႇ !

ဢႃႉ ! ၵၢၼ်ၵေႃႈၸိုင်ပေႉမႃးၼမ်လၢႆၵေႃႈဢမ်ႇႁူႉယဝ်ႉ ၼႂ်းဝူင်ႈဝၢင်ႈၼႆႉ၊ ဢၼ်လႂ် ဢၼ်လႂ်ၵေႃႈ တေလႆႈယဝ်ႉ ႁႂ်ႈၶိုတ်းတၼ်းၶၢဝ်းယၢမ်းဝႃႈၼႆ ပၢႆဢမ်ႇၵႃး သွင်သၢမ်ဝၼ်းမႃးၼႆႉ ပၢႆးယူႇလီသမ်ႉ လွင်ႈပဵၼ်ဝတ်းပဵၼ်ဢၢၼ်သမ်ႉ မႃးၵဝ်းလႄႈ ၵၢၼ်လၢႆလၢႆဢၼ်ၵေႃႈ တိုၵ်ႉၶမ်ဢုင်ဝႆႉယူႇ။ ၽွင်းယၢမ်းၸိူင်ႉၼႆ သင်မီးၵေႃႉၸႂ်လီၶဝ် ယွၼ်းမႃးပုၼ်ႈတႃႇတေၸွႆႈပၼ်ထႅမ်ပၼ်ၼႆတႄႉ ၸူမ်းသိူဝ်း … ႁႃတီႈဝႃႈပေႃးဢမ်ႇမီးသေယဝ်ႉဢိူဝ်ႈ။

ပူင်ၸႂ်ၵႂႃႇယူႇ ၸူဝ်ႈၵမ်းၵႅပ်ႉ

တေလႆႈလၢတ်ႈဝႃႈ ပူင်ၸႂ်ၵႂႃႇဢၼ်ၼိုင်ႈ ဝႃႈၼႆယဝ်ႉ မိူဝ်ႈၼႆႉတႄႉ၊ ၵွပ်ႈသင်ၼႆတႄႉၵေႃႈ ၵွပ်ႈပိူဝ်ႈ လႆႈဢၢပ်ႈၵၢၼ်ယဝ်ႉတူဝ်ႈၵႂႃႇ သွင်ဢၼ်ၼၼ်ႉယဝ်ႉ၊ ဢၼ်ၼိုင်ႈတႄႉ တေလႆႈ ၼႂ်းဝၼ်းၸၼ် ထိ 12.10.2009 ဝႃႈၼႆ၊ ထႅင်ႈဢၼ်ၼိုင်ႈတႄႉ တေလႆႈၸႂ်ႉၶၢဝ်းယၢမ်းယူႇမွၵ်ႈ 2 ဝူင်ႈၼႆယဝ်ႉ။ ၸိူင်ႉႁိုဝ်ၵေႃႈလီ ၵၢၼ်ဢၼ်ၼိုင်ႈယဝ်ႉၵႂႃႇ ၵၢၼ်ထႅင်ႈဢၼ်ၼိုင်ႈသမ်ႉ တိုၵ်ႉပႂ်ႉထႃႈဝႆႉ ပုၼ်ႈတႃႇယဝ်ႉတူဝ်ႈယူႇလႄႈ တေပူင်ၸႂ်ပူင်ၶေႃးယူႇမဵဝ်းလဵဝ် လူၺ်ႈဢမ်ႇႁဵတ်းဢမ်ႇသၢင်ႈသင်တႄႉၵေႃႈ မၼ်းႁိုဝ်တေပႃႈၸႂ်ႈၼင်ႇၵဝ်ႇ၊ ၼင်ႇႁိုဝ်တေယဝ်ႉတူဝ်ႈၵႂႃႇ လႄႈ ၶိုတ်းတၼ်းမိုဝ်ႉတၼ်းယၢမ်းၼၼ်ႉၵေႃႈ လႆႈဝႃႈပဵၼ်ဢမ်ႇလမ်ႇလွင်ႈၶိုၵ်ႉလိုၵ်ႉဝႆႉယူၼၼ်ႉယဝ်ႉ။

ၼွၼ်းလိုၵ်းလုၵ်ႉၸဝ်ႉသေတႃႉၵၢၼ်တႄႉႁိုဝ်ပႃႈယဝ်ႉ

ပွၵ်ႈမိူဝ်ႈၵႂႃႇႁိူၼ်း မိူဝ်ႈၶမ်ႈဝႃးၼႆႉ မီးၶၢဝ်းယၢမ်း ႑႐ မူင်းၶိုင်ႈပၢႆယဝ်ႉ၊ ဝႃႈၼၼ်သေတႃႉ ၵၢၼ်ဢွၼ်ႇဢၼ်ၼိုင်ႈၵူၺ်းၵေႃႈ ယင်းပႆႇယဝ်ႉတူဝ်ႈ တိုၵ်ႉလႆႈမေးမေး ၵႄႈၵႄႈ ၵႄႈယဝ်ႉၵႄႈထႅင်ႈယူႇ ဢမ်ႇႁူႉတေယဝ်ႉမိူဝ်ႈလႂ်မိူၼ်ၵၼ်၊ ဢၼ်ၼႄႉၼွၼ်းတႄႉ ပေႃးဢမ်ႇယဝ်ႉမိူဝ်ႈၼႆႉတႄႉ တိုၼ်းလူႉပင်း တိုၼ်းဢမ်ႇၶိုတ်းတၼ်း ပွႆးပၢင်ဢၼ်ယႂ်ႇလူင်ၼၼ်ႉယဝ်ႉ။ ၵူၺ်းၵႃႈၵေႃႈ ၼင်ႇႁိုဝ်တေယဝ်ႉၼႆသေ မိူဝ်ႈၼႆႉ မႃးထိုင်တီႈႁဵတ်းၵၢၼ် ၸဵမ်မိူဝ်ႈၶၢဝ်းယၢမ်း 07:45 ယဝ်ႉ၊ ၸိုင်ပေႉလုၵ်ႉၸဝ်ႉလႃႇၼႆၸိုင်တႄႉ ႁိုဝ်တေပႃႈၸႂ်ႈ၊ ၵွပ်ႈပိူဝ်ႈ တိုၼ်ႇယဝ်ႉၵေႃႈ ဢွၵ်ႇႁိူၼ်းမႃးၵမ်းလဵဝ်ၼၼ်ႉၼႃႇမိူဝ်ႈၼႆႉ၊ မိူဝ်ႈၵူႈဝၼ်းတႄႉ 08:30 ယဝ်ႉၸင်ႇၵွႆႈတိုၼ်ႇသေ မႃးမိူဝ်ႈထိုင်တီႈႁဵတ်းၵၢၼ် သမ်ႉပေႃးမီးၵႂႃႇ 09:15 ၸိူဝ်းၼႆႉၵွၼ်ႇဢိူဝ်ႈ။ ၸိူင်ႉႁိုဝ်သေၵေႃႈလီလႄႈ မိူဝ်ႈၼႆႉပွတ်းၼႂ်ၼႆႉ ၵၢၼ်ဢၼ်ၼိုင်ႈတႄႉ တိုၼ်းတေလႆႈႁ်ႂ်ႈမၼ်းယဝ်ႉတူဝ်ႈၼၼ်ႉယဝ်ႉ၊ မွၵ်ႈၼႆႉၵွၼ်ႇလႄႈၼေႃႈ တေသို်ပ်ႇႁဵတ်းၵၢၼ်သေၵွၼ်ႇ။

ၵၢၼ်ဢၼ်တေလႆႈယဝ်ႉ ထႅင်ႈ ႕ ဝၼ်း

မိူဝ်ႈၼႆႉ ဝၼ်းဢၢင်းၵၢၼ်း ထိ 7-10-2009၊ ထႅင်ႈ ႓ ဝၼ်းၵေႃႈ တေလႆႈလိုဝ်ႈၵၢၼ် ပုၼ်ႈတႃႇၵႂႃႇမိူဝ်း ၸွႆႈထႅမ်ၵၢၼ်တူင်ႇဝူင်း ၵူၺ်းၵႃႈ ၵၢၼ်လၢႆလၢႆဢၼ် တီႈဢၼ်ႁဵတ်းၵၢၼ်ၵေႃႈ ပႆႇယဝ်ႉပႆႇတူဝ်ႈ ဢိၵ်ႇပႃး ၵၢၼ်ဢၼ်တေလႆႈဢဝ်ၵႂႃႇမိူဝ်း တီႈပၢင်ပွႆး တူင်ႇဝူင်းၵူၼ်းၼၼ်ႉၵေႃႈ မီးယူႇထႅင်ႈ ႒ ဢၼ် ယင်းပႆႇယဝ်ႉတူဝ်ႈ၊ ဢမ်ႇႁူႉမိူၼ်ၵၼ်ဝႃႈ ၼႂ်းဝူင်ႈဝၢင်ႈၼႆႉ ၸွင်ႇတေမီးၶၢဝ်းယၢမ်း ပုၼ်ႈသုၼ်ႇတူဝ် ဢမ်ႇၼၼ် ၶၢဝ်းယၢမ်းလပ်းၼွၼ်း လိုဝ်ႈႁိူဝ်ႉမွႆႈႁိုဝ် ၼႆၵေႃႈ ယင်းပႆႇၼႄႉၼွၼ်း၊ ဢၼ်ၼႄႉၼွၼ်းတႄႉ ၵၢၼ်ဢၼ်ႁပ်ႉဝႆႉပုၼ်ႈၽွၼ်းတၢင်းမူတ်းၼၼ်ႉ တိုၼ်းတေလႆႈႁဵတ်းႁႂ်ႈမၼ်းယဝ်ႉတူဝ်ႈၼၼ်ႉယဝ်ႉ။